အလွမ်းဖြစ် သွားတဲ့ မိုး

ငါလေ နင့်ကို သတိရနေတယ်..ဘာလို့လဲ နင်မေးတော့မယ် မို့လား၊ ဒီမှာလေ မိုးတွေ တအားရွာတယ်၊ ငါ မိုးရွာတာ မကြိုက်တာ နင်သိတယ်လေ၊ အဲဒီတော့ မိုးရေထဲမှာ ငါ နင့်ကို သတိရတာပေါ့၊ မိုးခြိမ်းသေးလားလဲ မမေးနဲ့ ငါက လူကောင်ကြီး ကြီးသလောက် အသည်းက တော်တော်လေး ငယ်တာ နင် အသိဆုံးပဲ၊ မိုးကြိုးတွေ ပစ်လို့ အော်လိုက်ရတာ လမ်းသွားလမ်းလာ တွေတောင် မရှက်နိုင်ဘူး၊ ထီး ယူ သွားသေးလားလို့ မေးဦးမှာလား၊ ငါ ဘယ်တုန်းက ထီး ဆောင်ဖူးလို့လဲ၊ ထွက်တဲ့ အချိန် မိုးရွာနေမှ ယူသွားတတ်တာ နင် သိသားနဲ့၊ ပီးရင် ထားချင်တဲ့ နေရာမှာ ထားခဲ့တာလဲ မဆူနဲ့နော်၊ အခု ဒီရက်တွေမှာ ငါ ဘာတွေ စုမိလဲ နင်သိလား၊ ထီး တွေလေ၊ အဲ့ဒါ နင့်ကြောင့်ပေါ့၊ အပြင်တခါထွက် မိုးရွာတာနဲ့ တိုးလိုက်၊ မိုးရေထဲကို လျှောက်ချင်တဲ့ ငါ၊ နင်က ပြောတယ်လေ အသက်ကြီးပြီ၊ အသက်ကို ဥာဏ်စောင့်တယ်၊ ကိုယ့်ကျန်းမာရေး ကို ဂရုစိုက်ပါ ဆို၊ ဒီတော့ အမြဲ ထီးမပါတဲ့ ငါ ခဏခဏ ထီးဝယ်ရတယ်လေ၊ MRT က ထွက်တာနဲ့ ထီး ၀ယ်လို့ ရနေတာပဲ တော်သေးတယ်။

မိုးမိလာရင် ဆေးတလုံးလောက် ကော်ဖီလေးနဲ့ သောက်ထား ဖျားမယ်လို့ ပြောတာလဲ သတိရပေမဲ့ ငါက ဆေးဆို ဗမာဆေး ရော အင်္ဂလိပ်ဆေး ရော ကြောက်တတ်တာ သိတယ် မို့လား၊ ငါ့ ရဲ့ ထုံးစံ အတိုင်း ဓါတ်ကြမ်း တိုက်သလို ရေတွေချိုး ခေါင်းတွေ လျှော် လုပ်ရင်ရော၊ ဂရုဏာ ဒေါသောနဲ့ နင် သေတော့ မှာပဲလို့ မပြောနဲ့နော်၊

အခုလဲ မိုးတွေ မိလာပြန်ပီ၊ မိုးရွာရင် အလကားနေ စိတ်တို မျက်ရည်ကျတတ်တဲ့ ငါ ၊ မိုးရေထဲ မှာ ငိုမိတဲ့ အခါတွေ ပို သတိရနေပါတယ်၊ ငါ က မိုးရွာလဲ မျက်ရည်ကျ၊ နေပူလဲ ကျနေတာပါပဲ၊ နင်မကြိုက်ဘူးလေ၊ ငါ မျက်ရည်ကျရင် နင် သိပ်စိတ်တိုတယ်၊ အမြဲတမ်း မှာတတ်တဲ့ မိုးရွာမယ် ထင်ရင် အ၀တ်တွေ မလျှော်ခဲ့နဲ့ အပြင်ထုတ် မလှမ်းခဲ့နဲ့ဆို နင့်စကားကို နားမထောင်မိလို့ ခု အ၀တ်တွေ မိုးပြန်စို ကုန်လို့ နောက်တခေါက် ပြန်လျှော်ရပြန်ပီလေ။

ခုတော့ နင့်စကားအတိုင်း ငါ ကော်ဖီ ပူပူလေး သောက် နွေးနွေးထွေးထွေး ဘလော့ဂင်းမလို့ နင့်ကို သတိရတဲ့ အကြောင်းလေး ချရေးထားတာပါ၊