မိုင်တိုင်တခု အတွက် ပြာသော ကောင်းကင် (သို့) ကောင်းကင်ပြာ

ကျမ စာတွေ ဖတ်ပါတယ်၊ စာဖတ်တာ ဘာဆန်းသလဲ၊ စာဖတ်တာ ကောင်းပါတယ် ပြောကြတယ်၊ ကောင်းလဲ ကောင်းပါတယ်၊ ဒါပေမဲ့ ဖတ်ပြီး အသုံးချမှ ကောင်းမယ်လို့ ထင်တယ်၊ ကျမက စာဖတ်ပြီး နှပ်နေတတ်တဲ့ သူတယောက် မဟုတ်တဲ့ အတွက် စာတွေ ချရေးမိတယ်၊ အစက ဘယ်သူမှ ပြဖို့ မဟုတ်ပါဘူး၊ ဘယ်သူမှ ပြဖို့ မဟုတ်ရင် ဘာလို့ ဒီမှာ လာရေးနေလဲ၊ ကိုယ်ဘာသာ စာအုပ်ထဲ ချရေးထားပေါ့၊ အဲလိုလဲ မဟုတ်ပြန်ဘူး၊ ကျမ စိတ်ဝင်စားတာလေးတွေ ၊ ခံစားချက်လေးတွေ တချို့ စိတ်ဝင်စားမယ် ထင်လို့ပါ၊

ကျမ ရေးတဲ့ စာတွေထဲမှာ ရင်ထဲက ထွက်ပေါ်နေတဲ့ ခံစားချက်၊ ရင်ထဲမှာ ဖြစ်ပျက်နေတာတွေကို နားလည်သလောက် ချရေးတာပါ၊ ကျမ မိုက်မဲတာ၊ ထင်ရာ မြင်ရာတွေလဲ ပါမှာပါ၊ စာဖတ်တယ် ဆိုပေမဲ့ စာဖတ်အား နည်းပါသေးတယ်၊ ဗဟုသုတ လဲ နည်းတယ်၊ အဲ့ဒီတော့ ကျမ စာတွေကို ရသစာပေ၊ သုတ စာပေ၊ အကျိုးပြုစာတွေ ဘာတခုမှ အမည်မတပ်ရဲပါဘူ၊ ကဗျာတွေ ရေးတတ်သလားဆိုတော့လည်း မရေးတတ်ပါဘူး၊ တောင်ခြစ် မြောက်ခြစ် လျှောက်ခြစ်ရင်း ကဗျာလိုလို စာလိုလို ဆိုတာတွေ ဖြစ်လာတာ၊ ကျမ ဟိုးအရင် ပို့စ်တွေ မှာ ရေးဖူးသလိုပဲ၊ သူများတွေ အတွက်တော့ မသိ ၊ ကျမ အတွက်တော့ စာတပုဒ် ဖြစ်ဖို့ဆိုတာ ခုထိ ခက်နေတုန်းပါ၊ လက်တန်းလဲ မရေးနိုင်ပါဘူး၊ အရင် စာရွက်ထဲမှာ ရေးပြီးမှ စက်ပေါ် တင်နိုင်တာပါ၊ ကြုံတဲ့ နေရာ ကြုံသလို၊ ရထားပေါ်၊ ကားပေါ် မှာတော့ ရေးတတ်တယ်၊ ကျမ ရေးတာတွေဟာ ဘာဗဟုသုတ အချက်အလက်မှ မပါပါဘူး၊ အချက်အလက်တွေ ဆိုတာ အသေတွေပဲလို့ ကိုယ်ဘာသာ ခံစားမိလို့ ခံစားမှု တွေပဲ ပါမှာပါ။

ကျမရဲ့ စာတွေဟာ ကျမရဲ့ ဒိုင်ယာရီ သဘောမျိုး ဖြစ်နေတယ်၊ တခါတလေလဲ စဉ်းစားမိတယ်၊ ကိုယ့်စာတွေကိုယ် ဝေဖန်မိတယ်၊ ငါ့စာတွေဟာ ဘယ်သူ့မှ အဆိပ်အတောက် မဖြစ်တာတော့ သေချာတယ်၊ ဒါပေမဲ့ စာလာဖတ်သူတွေကို ရသတွေ ပေးနိုင်လား " နိုး " သုတတွေ ပေးနိုင်လား " လုံးဝပဲ " အကျိုး ရောပြုစေသလား " ဝေးသေးတယ် " နောက် တဖက်က ပြန်စဉ်းစားပြန်တယ်၊ ကျမက အလွမ်းတွေ ရေးတော့ လာဖတ်သူတွေရဲ့ အလွမ်းလေးတွေနဲ့ တိုက်ဆိုင်လို့ သတိရသွားရင် သတိရသူတွေ အတွက် ကောင်းတာပေါ့၊ နောက် ကိုယ်တိုင် ဗဟုသုတ နည်းတော့ သုတ စာပေဆိုတာ ရေးကို မရေးရဲပါဘူး၊ ဘာမှ မသေချာပဲ၊ မလုပ်ချင်၊ မရေးချင်တဲ့ စိတ်ကြောင့်ပါ၊ အကျိုးပြု စာတွေ ဆိုတာကရော၊ အင်း...ကိုယ်က အကျိုးပြုစေဆိုပြီး ဘယ်လောက် ရေးရေးပါလေ၊ စာဖတ်သူတွေက ဒီ အကျိုးပြုတယ် ဆိုတဲ့ စာကို လိုက်နာ ကျင့်သုံးနိုင်မှ အကျိုးပြုတယ် ဆိုတာ ဖြစ်လာမှာလေ၊ ကျမ ထင်တာ မှားချင်လဲ မှားနေမယ်၊ ကျမ ကိုယ့် ကိုယ်ကို ဝေဖန်ရင်း ကိုယ် မရေးနိုင်တာကို ကာကွယ်ကြည့်နေတာ။

အဲ့လိုတွေ မရေးနိုင်ရင် ငါ စာမရေးတော့ဘူးလား လို့ ကိုယ်ဘာသာ မေးကြည့်မိတယ်၊ ကျမ က စာရေးဆရာ တယောက်မဟုတ်ပေမဲ့ စာရေးနေသူ တယောက် ရဲ့ စိတ်ပဲလေ၊ ဘယ်နေမှာလဲ ၊ ရေးနေမှာပဲ၊ ရေးလို့ ရသလောက်၊ ဒီ အင်တာနက်ဆိုတာကြီး နဲ့ မဝေးကွာသရွေ့ ရေးနေမှာပဲ၊ ရေးချင်လွန်းလို့ တောင် အခု ကျမရဲ့ co.cc က တနှစ်ပြည့်လို့ ငွေပေး သက်တမ်းတိုးရမဲ့ အတူတူ ကောင်းကင်ပြာ.info ဆိုတာတောင် ကျမရဲ့ မောင်ငယ်လေး ၂ယောက်ရဲ့ အကူအညီနဲ့ ၀ယ်ထားပြီး ဆက်ရေးနေဦးမှာ၊ ကျမ စာရေးလာတာ ၂နှစ်ပြည့်တော့မယ်၊ ခု ကောင်းကင်ပြာ ဘလော့လေးကတော့ ၁နှစ်ပြည့်သွားပီ ပေါ့၊

ဒီရက်ပိုင်း မှာပဲ ကျမရဲ့ စာရေးချင်စိတ်ကို ပိုပြီး တွန်းအားပေးလိုက်တဲ့ စာအုပ်လေး တအုပ်လဲ ဖတ်မိတယ်၊ စာရေးဆရာ ကိုတာ ရေးတဲ့ စာရေးဆရာ တစ်ယောက်ရဲ့ မှတ်စုများ ဆိုတဲ့ စာအုပ်လေးပါ၊ သူ ရေးထားတဲ့ ထဲမှာ စာရေးသူ တယောက်မှာ " အတွင်းဝေဖန်ရေးသမား " ဆိုတာ အမြဲရှိတယ်၊ ဖန်တီးအားကလေးဟာ သံသယ တွေနဲ့ ကျပ်သွားတတ်တာပဲ၊ အတွင်းဝေဖန်ရေးသမား လက်မှ " အတွင်းက စာရေးဆရာ လွတ်မြောက်လာစေဖို့ " နေ့စဉ် မှတ်တမ်းကို အချက် (၇) ချက်နဲ့ အညီ ရေးတဲ့၊ " အတွင်း ဝေဖန်ရေးသမားရန်က အတွင်း စာရေးဆရာ လွတ်မြောက်ဖို့ကတော့ ရေးသာချလိုက် တဲ့ "

စိတ်ဝင်စားစရာပါပဲ...
(၁) လက်သာ လှုပ်နေ၊ မရပ်နဲ့၊ ဘယ်လိုဖြစ်ဖြစ်၊ ဒိုင်ယာရီ ရေးဖို့ တရက်မှာ ၁၀ မိနစ်ပဲ ပေး၊ ဒါဆို နေ့တိုင်း ရေးဖြစ်နေမှာပဲ။

(၂) မထိန်းနဲ့ ၊ ကိုယ်ပြောချင်တာ အတိအကျပြော၊ လူကြိုက်တာ မကြိုက်တာ ကိုယ့်ပုံရိပ်၊ ဒါ ဘယ်သူ ဖတ်မှာလဲ၊ အဲဒါတွေ မစဉ်းစားပဲ ရေး။

(၃) ရှင်းရှင်းလင်းလင်း ရှိပစေ၊ နာမ၀ိသေသန သုံးရင် ပေါ့ပေါ့ မလုပ်နဲ့၊ လူ၊ အရာဝတ္ထု၊ ခံစားမှုတွေကို ဖေါ်ပြရာမှာ အာရုံ စူးစိုက်ပြီး ရေး၊ " တောက်တောက် ပပ အနီရောင် မိနီ " လို့ ရေး၊ ကား လို မရေးနဲ့(အဲဒါ ကျမ သိပ်နားမလည်ဘူး)၊ တယ်လီဗေးရှင်း ဇာတ်လမ်းတွေလို မရေးနဲ့၊ ဘီဘီစီက အိမ်မြှောင် အကြောင်း ဇာတ်လမ်းရေး။

(၄) မတွေးနဲ့၊ မဝေဖန်နဲ့၊ မဆနဲ့၊ အရေးကြီးဆုံးက မရပ်လိုက်နဲ့၊ မျှောသာလိုက်၊ ခေါင်းထဲ ပထမဆုံး ရောက်လာတဲ့ အကြောင်းအရာနဲ့ စ၊ အဲဒီက ရှေ့တိုး။

(၅) ပုဒ်ဖြတ်၊ သတ်ပုံ၊ သဒ္ဒါကို မငဲ့နဲ့၊ အသေးစိတ် တွေမှာ တုံ့မနေနဲ့၊ နောက်ပြန်ကြည့်ပြီး ရွှေကို ပြန်တူးလို့ ရတာပဲ။

(၆) အမှိုက်သရိုက်တွေ ရေးချင် ရေးဦး၊ လွတ်လပ်နေတာပဲ၊ ညံ့သွားပစေ၊ ကိုယ့်ကိုယ်ကို ခွင်ပြုလိုက်၊ အတန်းကျပစေ၊ ဆီသည်မ လက်သုပ် ဖြစ်ပစေ၊ မထူးမဆန်း ဖြစ်ပစေ၊ ရေးသာရေး။

(၇) စိတ်လို လက်ရ ရှိတာကိုပဲ လုပ်နော်၊ သက်တောင့် သက်သာ မရှိလှတဲ့ အကြောင်းအရာ တွေထဲမှာ ၀ဲလှည့်မနေနဲ့၊ အရေးအသား ကောင်းဆိုတာ ခက်တယ်၊ နာကျင်မှုကို ရှောင်တဲ့ အရေးအသားဟာ လှချင်လှမယ်၊ ဒါပေမဲ့ ဝေးကွာနေပြီး နားလည်ဖို့ ခက်မယ်။

ဒီ (၇) ချက်ကို ဖတ်မိပြီး ကျမ အားတတ်လာပါတယ်၊ သူ ပြောသလို ရေးဖြစ်ဖို့က အရေးကြီးတာကိုး၊ ဖီလင် ရှိတာ မရှိတာ မဟုတ်ဘူး၊ ရေးနေဖို့ က အဓိကပဲလေ၊ ခု ကျမ ဘလော့လေး တနှစ်ပြည့်သွားပြီ၊ နောက်ထပ် နှစ်တွေ ဆက်ပြီး ကျမ ရေးနေဦးမယ်၊ စာတွေလဲ ဖတ်နေဦးမယ်၊ တောင်ခြစ်မြောက်ခြစ်တွေ လဲ ခြစ်နေမယ်၊ ကြောင်တောင်တောင် တွေလဲ ရေးမယ်၊ ကျမ ရေးနေတာတွေကို ကိုယ့် ကို ချစ်လို့ခင်လို့ လာဖတ်နေသူတွေ၊ အားနာပါးနာ လာဖတ်သူတွေ၊ ဖတ်ချင်လို့ ဖတ်နေသူတွေ အတွက်လဲ ကျမ ရေးနေဦးမှာပါ၊ ကျမ ဘလော့လေးကို လာလည်သူ လာဖတ်သူ အားလုံးကိုလည်း ဒီနေရာလေးကနေ ကျေးဇူးတင်ပါတယ်လို့လဲ ပြောချင်ပါတယ်။