လှေကလေး

လှေကလေး
ပင်လယ် ကမ်းစပ်မှာ တယောက်ထဲ ရပ်နေတုန်းကပေါ့၊ လှေကလေး တစင်း တွေ့တယ်၊ ဒီလှေကလေး နဲ့ ကိုယ်နဲ့ စကားတွေ ပြောဖြစ်ခဲ့ကြတာပေါ့၊ ကိုယ့်ကို လှမ်းပြောတယ်၊ သူငယ်ချင်း...လူဖြစ်ခိုက် ရေပြင်ပေါ်မှာ ရွေ့လျားနိုင်ဖို့ လှေ ရှိတုန်း လှော်ကြည့်ပါလားတဲ့....

ဘယ်ထိ လှော်နိုင်မှာလဲလို့  လှေ ကလေးကို မေးကြည့်တော့ ပင်လယ်ပြင်ဟာ သွေးကြောတွေလိုပဲ လောကနိယာမ ရေပြင်ပေါ်မှာ စီးဆင်းနေသတဲ့လေ၊ ရှည်လျားသလောက် ကွေ့ကောက်နေမှာပဲတဲ့၊ စုန်မျောမှု အားလုံးဟာ ပြန်ဆန် တက်ပေးရသလို ပဲ ဆန်တတ်မှု မှန်သမျှ ဟာလည်း နောက်ဆုံး မျှောချ ပစ်ရတာပဲ့တဲ့၊ ကိုယ့်စိတ်ထဲကတော့ လှော်ကြည့်ရင် ကောင်းမလားပေါ့..၊

သူက ဆက်ပြောပြန်တယ်၊ ရေပေါ် ပေါ်ခွင့်ရတုန်း ခရီးဆက်ခွင့် ရှိတယ်တဲ့၊ ကိုယ်ကလဲ ကိုယ်သွားမဲ့ လမ်းကို လှေကလေး သိလို့လားလို့ ပြန်မေးမိတယ်၊ သူပြန်မဖြေဘူး၊ သူထပ်ပြောတာက လှိုင်းစီးချင်ယုံ သက်သက် နဲ့တော့ လှေပေါ် မတတ်ပါနဲ့တဲ့၊ လက်မောင်းကြွက်သားတွေ မကောင်းဘူးဆိုရင်လည်း လှော်တတ်မကိုင်ပါနဲ့တဲ့၊ ဘာမှ မလုပ်တတ်သူ အတွက် မျောပါသွားတတ်လို့ပါတဲ့၊ သူ ပြောတာ အမှန်တွေပဲလေ၊ ကိုယ် နဲနဲ တွေဝေ နေတယ်...

သူ့ရဲ့ အသံတိတ် ဘာသာ စကားကို ကိုယ်နားလည်စွာ ဆက်နားထောင်နေမိတယ်၊ သူက ဝဲကတော့တွေရဲ့ လှည့်စားမှုက အားသန်ကြသလို ယမုံနာ လေပြင်းက လေညင်းမဟုတ်ဘူးတဲ့၊ ပင်လယ်ပြင်ဟာ ရေသေကို လက်ခံမထားဘူးတဲ့၊ အဟန့်အတား ဒိုက်သရော ဘဝတွေကို လာပတ်တတ်ပြီး တချို့ အပုပ်ကောင်တွေရဲ့ သတင်းအနံ့ ကလည်း ဆိုးလွန်းတယ်တဲ့၊
ဒါပေမဲ့ သူက လှော်ကြည့်စေချင်တယ်..၊

လှော်ကြည့်ပါလား.....လှော်ကြည့်ပါလား....
သူခဏ ခဏ ပြောနေတယ်၊ စကားလုံးတွေ ခင်းပြတယ်၊
တကယ်လို့ လိုရာ ဆိပ်ကမ်းကို ရောက်ခဲ့ရင်တော့ သူ့ဘဝ ရပ်တည်မှုအတွက် တိုင်တတိုင်၊ ငုတ်တငုတ် မှာ ချည်နှောင် ပေးရစ်ခဲ့ပါတဲ့၊ သူဟာလည်း လှော်သူ မရှိရင် လွင့်မျောတတ်တဲ့ သဘောရှိတယ်တဲ့...
ကိုယ် လှေလေးကို လှော်ရမလား၊ ဒီတိုင်း လှည့်ပြန်လာရမလား၊ လှေလေးရဲ့ စကားသံတွေ နားထဲမှာ ပဲ့တင်ထပ်........


ကဗျာလေး တပုဒ် ဖတ်မိပြီး ကြိုက်လို့ စကားပြေ သဘောမျိုး ရေးကြည့်တာပါ...( လှေစကား နားမလည်သူ တယောက်ပါ)